ਕੈਨੇਡਾ: ਬਾਜ਼ਾਰਾਂ ‘ਚ ਜਲਦ ਸ਼ੁਰੂ ਹੋਵੇਗੀ ਭੰਗ ਨਾਲ ਬਣੇ ਖਾਣ-ਪੀਣ ਦੇ ਸਮਾਨ ਦੀ ਵਿਕਰੀ

ਓਨਟਾਰੀਓ: ਕੈਨੇਡਾ ‘ਚ ਭੰਗ ਦੀ ਵਿਕਰੀ ਨੂੰ ਕਾਨੂੰਨੀ ਮਾਨਤਾ ਮਿਲਣ ਤੋਂ ਬਾਅਦ ਹੁਣ ਦਸੰਬਰ 2019 ਤੋਂ ਭੰਗ ਨਾਲ ਬਣੇ ਖਾਦ ਪਦਾਰਥਾਂ ਦੀ ਵੀ ਜਾਇਜ਼ ਢੰਗ ਨਾਲ ਬਾਜ਼ਾਰਾਂ ‘ਚ ਵਿਕਰੀ ਸ਼ੁਰੂ ਹੋ ਜਾਵੇਗੀ।

ਹਾਲਾਂਕਿ, ਸਰਕਾਰ ਨੇ ਸ਼ੁੱਕਰਵਾਰ ਦੇ ਆਪਣੇ ਐਲਾਨ ਵਿਚ ਕਿਹਾ ਕਿ ਬੱਚਿਆਂ ਨੂੰ ਇਨ੍ਹਾਂ ਤੋਂ ਦੂਰ ਰੱਖਣ ਦੇ ਮਕਸਦ ਨਾਲ ਉਨ੍ਹਾਂ ਨੇ ਗਮੀਬੇਅਰਸ, ਕੈਂਡੀਜ਼ ਤੇ ਲਾਲੀਪੌਪ ਜਿਹੀਆਂ ਚੀਜ਼ਾਂ ‘ਚ ਭੰਗ ਦੀ ਵਰਤੋਂ ਨੂੰ ਮਨਜ਼ੂਰੀ ਨਹੀਂ ਦਿੱਤੀ ਗਈ।

ਦੱਸ ਦੇਈਏ ਕਿ ਕੈਨੇਡਾ ਨੇ ਬੀਤੇ ਸਾਲ ਇੱਕ ਕਾਨੂੰਨ ਬਣਾ ਕੇ ਭੰਗ ਦੀ ਵਰਤੋਂ ਨੂੰ ਜਾਇਜ਼ ਐਲਾਨ ਕਰ ਦਿੱਤਾ ਸੀ। ਉਸ ਤੋਂ ਬਾਅਦ ਇਹ ਨਵਾਂ ਕਾਨੂੰਨ 17 ਅਕਤੂਬਰ ਤੋਂ ਪ੍ਰਭਾਵੀ ਹੋਵੇਗਾ। ਇਹ ਕਾਨੂੰਨ ਭੰਗ ਦੇ ਰਸ ਤੇ ਸਰੀਰ ‘ਤੇ ਲਗਾਉਣ ਵਾਲੀ ਮਲਹਮ ‘ਤੇ ਵੀ ਲਾਗੂ ਕੀਤਾ ਜਾਵੇਗਾ।

ਅਧਿਕਾਰੀਆਂ ਨੇ ਮੀਡੀਆ ਨੂੰ ਦੱਸਿਆ ਕਿ ਇਹ ਉਦਯੋਗ ਨਵਾਂ ਹੈ ਤੇ ਇਨ੍ਹਾਂ ਨਵੇਂ ਉਤਪਾਦ ਦਸੰਬਰ ਦੇ ਦੂਜੇ ਹਫ਼ਤੇ ਤੋਂ ਪਹਿਲਾਂ ਬਾਜ਼ਾਰ ਵਿਚ ਆਉਣ ਦੀ ਸੰਭਾਵਨਾ ਨਹੀਂ ਹੈ। ਇਸ ਨੂੰ ਉਪਭੋਗਤਾਵਾਂ ਦੇ ਹਿਸਾਬ ਨਾਲ ਵਿਕਸਿਤ ਹੋਣ ਵਿਚ ਕੁਝ ਸਮਾਂ ਲੱਗੇਗਾ।

ਕੈਨੇਡਾ ਸਰਕਾਰ ਵਿਚ ਭੰਗ ਨਾਲ ਜੁੜੇ ਸਾਰੇ ਮਾਮਲਿਆਂ ਦੇ ਇੰਚਾਰਜ ਬਿਲ ਬਲੇਅਰ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਸੋਧੇ ਹੋਏ ਕਾਨੂੰਨ ਦਾ ਮਕਸਦ ਖਾਣ ਲਾਇਕ ਭੰਗ, ਭੰਗ ਦਾ ਰਸ ਤੇ ਭੰਗ ਤੋਂ ਬਣਨ ਵਾਲੀ ਮਲਹਮ ਆਦਿ ਨਾਲ ਸਿਹਤ ਨੂੰ ਹੋਣ ਵਾਲੇ ਖ਼ਤਰੇ ਨੂੰ ਘੱਟ ਕਰਨਾ ਹੈ। ਕੈਨੇਡਾ ਵਿਚ ਇਨ੍ਹਾਂ ਉਤਪਾਦਾਂ ਦੇ ਮੌਜੂਦਾ ਗੈਰ ਸਰਕਾਰੀ ਬਾਜ਼ਾਰ ਨੂੰ ਖਤਮ ਕਰਨਾ ਹੈ।